Page 32 - Preschaint Nummer 5

30 preschaintin das Magazin im Magazin
L’ultima chesa sper la via
La via nu maina pü inavaunt. Il fargun ho stumplo insembel ün mantun da naiv. Eau parc mieu auto davaunt quist mür alv, a schnestra da l’ultima chesa. Sortind da l’auto, vegn eau salü- do d’ün silenzi paschaivel. Davaunt l’entreda sun puzzedas dua pêra skis da turas, cò e lo sguotta que – l’unica rumur pel mumaint. Poch zieva od eau mia egna vusch chi clama aint pel suler ch’eau saja rivo.
Eau fatsch la cugnuschentscha d’üna duonna chi’d es turneda avaunt bod duos ans da Cuira. Uorschla Campell ho vivieu bgers ans immez la cited – sainza curtin, ma cun tuot il travasch d’üna cited! Il cuntrari da que ch’ella ho cugnuschieu aunz e cugnuoscha hoz darcho. „Eau sun steda e resteda üna da la periferia“, managia ella. La Veduta a Cinuos-chel, la puraria a Chapella e la scoula secundara a S-chanf fuorman pü u main il radius da si’infanzia. Zieva la scoula da commerzi a Cuira e sogiuorns a l’ester es ella turneda a Susauna ed ho drizzo aint illa Chesa Cotschna, oriundamaing üna farm da vuolps, üna dmura per iffaunts da la Belgia chi pativan d’astma. Zieva 10 ans chesa d’iffaunts es seguida la scolaziun scu cusgliedra da professiun e supervisura ed il retuorn parziel a Cuira. „Scu cusgliedra cun egen büro d’he eir colla- vuro in differents progets, p.ex. per fabricher sü la chesa da duonnnas, per realiser ils progets dal giubileum „200 ans Grischun illa Confederaziun“ u per svilupper e realiser il concept da scolaziun e furmaziun per rtr.“ Susauna es in tuot quist temp resto sieu center ed il vair dachesa. Ün concept da vita pretensius, avaunt tuot pels oters. „Per quels da Cuira d’eir’eau dapü in Engiadina e pels Engiadi- nais adüna a Cuira.“
Uossa ch’ella es pensiuneda, es l’ultima chesa da Susauna darcho abiteda tuot an. Üna pitschna abitaziun haun sieu partenari ed ella mantgnieu a Cuira. Ma pel mumaint es que cler: „La cited, tuot ils stimuls, la canera e la hectica nu’m maunchan. Il silenzi stim eau hoz dapü. „E cu tuna’l, il silenzi?“ Svelt vain la resposta: „Ad es la rumur d’ün tschierv chi chamina intuorn chesa da not, il vent u ils utschèls chi tschüvlan.“ Ella surria. „Hai, minch’au- to e mincha tun na üsito s’oda. Nouv es la rumur da velos. Ella spievla eir ün müdamaint remarcha- bel illa val: Ils mountainbikes passan cun tempo speravi. Culs peduns daiva que interessants discuors e bels inscunters.“
Cu es que cun contacts in generel? „Hoz stögl eau organiser activmaing ils contacts persunels. Digitel- maing essans daspö cuort collios bain, grazcha a la fibra da vaider.“ Chantunais? Davous chesa vain be l’alp, il pass dal S-chaletta, Dischma u Sertig e Tavo, davaunt chesa es il Piz d’Esen il pü domi- nant, e la chesa a dretta nun es abiteda. Dit cuort: natüra püra. A Susauna abitan tuot an och per- sunas ed ün iffaunt, e que in tschinch da las desch chesas. „Nus vains üna buna fuorma da viver e lascher viver. La controlla sociela funcziuna da buna maniera. Ün avantag. Cur ch’eau vaiva schmancho ün di da serrer üna fnestra, m’ho la