Page 24 - Preschaint Nummer 6

22 preschaint das Magazin DACHESA? Ün corv es svulo üna vouta dalöntsch davent da la riva. El es dvanto staungel e sias elas al tgnaivan melapaina sur l’ova. In ün dandet es üna balena cumparida a la surfatscha, ho aviert sia buocha vasta, ed il corv es crudo aint. Intuorn el eira üna s-chürdüna cumpletta. El ho udieu las battidas suordas d’ün cour. Nu vzand ünguotta, s’ho’l inchambüerlo tres ün tunnel ed es finelmaing rivo in üna stüva d’öss prüveda e choda. Aint immez eira üna lampa e daspera üna giuvna duonna: „Sajast bainvgnieu“, ho’la dit, „e sainta’t da chesa. Üna supplicha d’heja però: Nu tucher mia lampa, per plaschair!“ Ella es steda sü ed es sortida tres ün üsch ... e zieva ün tschert temp è’la darcho turneda, es resteda üna pezza tar la lampa ed es danövmaing partida. Aunz ch’ella turness darcho, ho il corv tucho la lampa, be svelt e be per buonder. A listess mumaint es la giuvna duonna crudeda aint dad üsch e giò sül fuonz, la glüsch s’ho stüzza, il cour ho glivro da batter. Ün profuond silenzi s’ho deraso in quist lö chi – poch aunz – eira sto ün dachesa agreabel e prüvo. Che ambiaint sul cha que d’eira uossa! Il corv vulaiva be pü fügir our da la balena morta. El es undagio inavous tres il tunnel, es sortieu tres la buocha e s’ho miss sül corp da la balena. Vent ed uondas il chatschaivan vi e no. Düraunt bgers dis s’ho il corv nudrieu da la coga. Vai- va’l inclet ch’el vaiva mazzo qualchosa bel e bun, nempe la balena e sieu esser amiaivel? – Apaina ch’el eira rivo in üna baja, l’haun ils abitants celebro scu ün eroe. Seguond üna parevla dals Inuits d’Alasca Freundschaft ist wie ein Haus. Beziehungen sind wie ein Daheim. Bewohnbar bleibt es, wenn wir es pflegen. – Ein Inuit-Märchen erzählt von einem Raben, der sich auf offenem Meer in den Bauch eines weiblichen Wals hat retten können. Doch es kommt anders, weil er die Freundschaft verletzt.