Page 11 - Preschaint Nummer 8

«A’s sdasda il muond, ma eir ti’orma» Ulrica Morell es schurnalista e mamma. Sieu temp liber passainta ella il pü gugent illas muntagnas. Cul «sdasder» es ella confrunteda di per di e que in püssas manieras. Ulrica Morell ho gugent la bunura bod, quel mumaint, cur cha’l di es auncha fras-ch ed innozaint. Per ella nu do que qualchosa pü bel cu da ster sü bodezzas, passer auncha adas-chür tres il god culla glüsch da frunt sül cho, sü vers la muntagna. Da river sül piz, güst cur cha’l sulagl alva, e dad esser alura part da quist misteri natürel, que sun per Ulrica mumaints magics. «A’s sdasda il muond, ma eir ti’orma e’l spiert», disch ella. Temp per refletter Ulrica nun ho fadia da ster sü, que nun ho’la auncha mê gieu. Cur ch’ella as sdasda, as dumanda ella suvenz: Che pudessi fer meglder hoz? Il mumaint dal sdasder drouva ella per refletter e per preparer il di. Que la vain a bön in sieu mister, ma eir scu mamma da trais mats traunter quatter e desch ans. Scu redactura tar la televisiun rumauntscha (RTR) do que adüna darcho contribuziuns, inua cha’l di cumainza bod. Ed eir in sieu temp liber es la sportista paschiuneda suvenz già in gir, cur cha la granda part da la glieud es aunch’in ün sön profuond. «Eau d’he gugent quel mumaint dal sdasder; mincha di spordscha nouvas pussibilteds», disch Ulrica. Viager evra ils ögls Ulrica ho 42 ans, es creschida sü a Puntraschigna insembel cun üna sour pü veglia. Zieva la matura al Lyceum Alpinum Zuoz ho la giuvna Engiadinaisa stuvieu trer la prüma decisiun, in che direcziun cha sia vita dess ir. Ella ho decis da dvanter magistra scu sieu bap. Zieva sia scolaziun a Turich ed a Cuira es Ulrica turneda in Engiadina ed ho lavuro ün pêr ans scu magistra primara a Samedan ed a San Murezzan. «Eau d’he fich gugent do scoula», quinta ella. Per pudair fer ün viedi ill’America dal Süd ho ella però desdit sia preschaint das Magazin 9