Page 15 - Preschaint Nummer 8

Eau sun sulet. Sul sulet. Abanduno. Duluors corporelas pretendan già l’attenziun totela. Impü auncha duluors psichicas. Ed eir duluors spirituelas in tuot lur profundited: «Mieu Dieu, perche m’hest abanduno?» E tuot in üna vouta il sömmi : Our dal crap cumainza a cuorrer ova ! Scu tar Moses ed Aaron i’l desert. Chi mê vess cret ? Transfurmaziun ! La crousla rumpa. Ün prüm dscherm cumpera. Eau cumainz a discuorrer. Mieus prüms pleds illa s-chürdüna. Oters seguan. Eau viv. In che relaziuns? Üna glüsch aintra illa s-chüraglia. Purteda quaidamaing d’ün giuvenil. Ed as daresa i’l spazi. Pür uossa vezzi ch’eau sun sto in cumünaunza cun oters tuot il temp. Eau vez las vistas. Qualche vistas sun bain cuntschaintas. Aunch’üna vouta : Chi mê vess cret ? Minchün da nus tegna üna chandaila fina in maun. Ün do inavaunt a l’oter la glüsch. La flamma da la chandaila da Pasqua crescha in nossa raspeda. «Crist es resüsto dals morts!» es confessiun ed ün suspir da schligerimaint chi’s transmüda in musica. «Dans nos obscurités, allume le feu qui ne s’éteint jamais ...» - La melodia as repeta e’s repeta – bod scu ün mantra. Quels chi la taidlan e la chantinan vegnan purtos da tuns e pleds. Dasper la baselgia cumainzan ils merls a tschüvler. Il chaunt nu cugnuoscha pü ün dadains ne ün dadour. La damaun s’ho sdasdeda. preschaint das Magazin 13